Святлана Крук школу скончыла з залатым медалём. З дзяцінства яна марыла стаць урачом ці міліцыянерам, але, як гэта часта бывае, жыццё ўнесла свае істотныя карэктывы.
Першую вышэйшую адукацыю Святлана атрымала на матэматычным факультэце Гродзенскага Дзяржаўнага Ўніверсітэта імя Янкі Купалы (дыплом з адзнакай), другую - у Вышэйшай школе эканомікі (Дзяржаўны ўніверсітэт, Расія).
Цікава, што апошняя засвоеная Святланай спецыяльнасць - "менэджмент і камунікацыі ў індустрыі моды". Святлане патрапіліся выдатныя выкладчыкі, сярод якіх былі і модны крытык Эвяліна Хромчанка, і гісторык моды Аляксандр Васільеў.
Святлана Крук - пераможца самага першага Нацыянальнага конкурсу "Міс Беларусь", які прайшоў у 1998 годзе.
У наступным годзе Святлана ўвайшла ў лік фіналістак кантынентальнага конкурсу "Міс Еўропа 1999", а таксама заваявала тытул "Віцэ-міс СНД 1999".
У 2000 годзе Святлана Крук стала першай прадстаўніцай Беларусі на міжнародным конкурсе "Міс Свету", але, нажаль у ТОП-10 не ўвайшла.
Беларуская прыгажуня мае вялікі вопыт працы мадэллю (подыум, рэклама, друкаваныя выданні) у Беларусі, Расіі і за мяжой (Італія, ЗША, Кітай).
Зараз Святлана жыве ў Маскве, працуе выкладчыкам матэматыкі ў цэнтры адукацыі, а таксама выкладчыкам Школы мадэляў, вядзе заняткі па аўтарскай методыцы і праграме "Подыум. Мода. Стыль".
У 2010 годзе яна прыняла ўдзел у конкурсе "Настаўнік года Масквы" і ўвайшла ў дзесятку лепшых педагогаў расійскай сталіцы.
Пасля шлюбу Святлана ўзяла прозвішча Кузняцова. Шчаслівая ў шлюбе, мае дваіх сыноў: Андрэя (8 гадоў) і Мікіту (2 гады).
Святлана Кузняцова калекцыяніруе лялек у нацыянальных касцюмах з розных краін свету, любіць падарожнічаць, спяваць і гатаваць.
Яна прызнаецца: "Самае лепшае, што са мной адбылося ў жыцці – гэта мацярынства! Мама - гэта не роля. Гэта - шчасце. Гэта - сэнс. Гэта - жыццё."
Сёлета Святлана Кузняцова прадставіць Беларусь у міжнародным конкурсе прыгажосці "Місіс Сусвет 2013", які адбудзецца на востраве Аруба.
