У тэкстураванай нітцы звілістая кожная монанітка, што перашкаджае іх шчыльнаму ўкладванню ў комплекснай нітцы.
Ад звычайных комплексных нітак тэкстураваныя ніткі адрозніваюцца паніжанай аб'ёмнай масай (для тэкстураваных нітак яна ў 10-20 разоў меншая, чым для гладкіх нітак), большай порыстасцю, мяккасцю і ў некаторых выпадках вялікай пругкай расцяжнасцю - высокарасцяжныя тэкстураваныя ніткі (гандлёвыя назвы: стрэч, хеланка, эластык і інш.), маюць расцяжнасць да 400%. Вырабляюць тэкстураваныя ніткі пераважна з сінтэтычных палімераў. Асноўны паказчык эксплуатацыйнай каштоўнасці тэкстураваных нітак і вырабаў з іх - устойлівасць звілістасці; найбольшую ўстойлівасць маюць тэкстураваныя ніткі з капрону і аніду. Выкарыстоўваюць тэкстураваныя ніткі для вырабу паветрапранікальных, гіграскапічных тканін і трыкатажу, а таксама шкарпэтак, панчох, штучнага футра і інш. М.Р.Пракапчук [1]