тэкстыльная тканіна

Вырабляецца на ткацкіх станках. Знятая з ткацкага станка тканіна называецца суравізнай. Яна становіцца гатовай для выкарыстання пасля адбельвання, фарбавання, спецыяльнага прамочвання (напрыклад, апрэтавання, мерсерызацыі) і інш. відаў апрацоўкі. Таўшчыня тэкстыльнай тканіны - 0,1-5 мм, шырыня - 0,4-1,5 м (тканіны шырынёй да 0,4 м называюць стужкамі). Тэкстыльныя тканіны падзяляюць на аднародныя (з аднаго віду валокнаў - баваўняная тканіна, ільняная тканіна, шарсцяная тканіна, шаўковая тканіна), мяшаныя (з нітак, атрыманых з некалькіх відаў валокнаў), неаднародныя (з розных нітак). Вырабляюць тканіны з гладкай паверхняй і з ворсам (ворсавая тканіна), стракатыя (з рознакаляровых нітак) і меланжавыя (меланж), гладкафарбаваныя (афарбаваныя ў адзін колер) і набіўныя (з друкаваным узорам на добрым баку), адна- і мнагаслойныя. [1]